信息时报：集邮何须高端

　　白话广州 ◎李月婷 编辑

　　听闻广州第一个邮币交易市场前两日开张，而且仲固定日期开市，好受市民欢迎。中意集邮收藏嘅街坊到时每个月都可以去趁下墟，同其他集邮爱好者交流一下。我希望嘅系，呢个集市唔单单系高端邮品嘅集市，而且会有更多小朋友参与。

　　大家不妨问下身边嘅朋友，睇下有几多人细个嘅时候将集邮当成兴趣爱好，一直坚持到自己大个仔大个女呢？恐怕有咁嘅恒心嘅小朋友，而家都已经可以成为半个集邮专家了。

　　其实，我细个嘅时候都集过邮。因为以前唔似依家，小朋友冇咁多娱乐活动，亦都冇咩兴趣班。就算家长再想子女成龙成凤都好，最多就系带佢哋学下画画、弹弹琴、跳个舞。可以陶冶细路仔性情嘅，就只有集邮呢个方式喇。而且，最关键嘅系，当时亲友之间联络多数都系靠平信。我一个亲戚嘅亲戚，经常会喺香港写信返来。我就时不时都会拿到一啲精美特别嘅邮票。嗰种经过漫长等待最后收获一张邮票嘅快感，比普通玩具更加可以满足一个小朋友。

　　其实，喺手机互联网出现之前，好多人都保留写信嘅习惯。不过，好多人已经唔再集邮。可能因为用来寄信嘅邮票已经冇收藏价值，而有收藏价值嘅邮票亦唔再系普通人消费得起嘅玩意。当通讯工具越来越发达之后，写信嘅人少咗，剪信封集邮票嘅人就更加少喇。

　　其实，我觉得集邮享受嘅系一个过程。